牛屋餐廳

本來老公既爺爺已經出左院,點知情況又再告急,前幾日入左ICU,連探病都唔俾,今日終於轉左普遍病房所以放左工就同老公去探病~~睇見爺爺真係好辛苦,情況應該唔樂觀,好多親戚都黎左,唯獨老爺好似仲未黎探過病...連姑姐都叫我老公番去同佢講快d見下爺爺...其實我真係覺得老爺份人幾奇怪,新年又唔去拜年,成日淨係識叫我地去睇爺爺~~所以話同老爺真係溝通唔到

都係講番今晚既晚餐啦,8點幾好肚餓,但係好多地方都要排隊等位喎~~最後老公醒起我成日經過都話想試既牛屋餐廳,所以就去左食啦~~好在剛好仲有一張2人檯唔使等~~

叫得牛屋,咁就梗係要食牛啦老公叫左個普通晚餐,而我就叫左個貴價既牛柳餐,套餐包餐包、餐湯、頭盤同埋餐飲~

餐包:已經預先放左牛油,熱辣好味~~

羅宋湯:從來都未飲過咁多薯仔既羅宋湯,連老公都話好味~

蒜茸汁珍寶腸:呢個係頭盤,老公仲以為係原條上,點知原來係切片~~呢個無咩特別啦

新西蘭西冷扒($53):首先係配菜既西蘭花好味道,我都好少覺得西蘭花好食既,唔錯~~老公都有切少少西冷扒俾我試,佢要左6成熟,味道同質素都好唔錯...呢個價錢好抵呢~

芝士鵝肝醬牛柳($128):輪到我呢個牛柳啦唔好睇佢無老公個塊咁大舊,但係超厚身架我要左5成熟,雖然只係鵝肝醬舖面,不過鵝肝味都唔錯...而塊牛柳更加係充滿肉汁,我都比左4分1老公食~~佢都讚牛柳好juicy~~本來我初初都覺得百二蚊貴貴地架,不過食完之後就覺得超值...推介推介

大家想食有質素既牛又唔想太貴,可以考慮呢間牛屋餐廳呢,不過餐廳格局係酒吧feel,而且有d逼架~~不過同一條街仲有間新牛屋,大家唔好去錯呀

今餐$193,待應話要食過$200先可以簽卡...我見隔離檯簽卡好似要俾手續費喎,大家都係問清楚勒~~

0830的晚餐 ~ 洋蔥脆皮腸炒蒜茸意粉

今日老公上堂,我本來諗住是但買d外賣番屋企食就算,不過諗諗下又直接番左屋企~~

唔想煮即食麪,又無買餸,最簡單莫過於整意粉啦~~

一句講晒快、靚、正...仲留埋飯盒,又慳番一餐勒

0829的晚餐 ~ 涼拌青瓜片、豆卜銀絲蒸豆豉排骨、蕃茄炒蛋

今日有少少唔舒服,其實就無咩特別事,不過都請左病假休息下~~

老公聽晚要上堂、後晚又有約會,所以今晚都係煮下飯食啦~~今日有新嘗試呢

涼拌青瓜片:

青瓜片係咪切得好靚呢~~其實我係超市買時剛新鮮切好左,一包只係$2.9咋涼拌汁就係用係北海道買番黎既沙律醬整既,所以有d芝麻lor~~老公話味道唔錯喎~~

豆卜銀絲蒸豆豉排骨:

之排聽電台學到用豆卜擺底蒸排骨會好味,於是今日就試下啦,仲加埋粉絲,豆卜粉絲吸收左排骨味道既精華果然幾好味....不過唔知點解蒸完出黎無咩汁,所以乾左少少...我仲舖左d辣瑤柱絲係面,老公話好味道喎~

蕃茄炒蛋:

其實我好似無煮過呢味餸,簡簡單單加埋佢,咁就煮好左一餐3餸既晚飯,仲有聽日既飯盒勒

0828的晚餐 ~ 白汁芝士意粉配香腸蒜茸包

老公今日又有飯局,所以得我一個人咋~~

本來諗住是但買d野番屋企食,不過又唔想使錢...最後都係番屋企煮個意粉,順便留埋飯盒~~

好味又好飽

魚一丁刺身屋酒屋

今日老闆請食晏,暑期工妹妹鐘意食日本菜,佢地話未試過魚一丁,所以提議去呢到食~~

我地當然唔會同老闆慳啦,不過預早訂位會有8折架~~

平時都係夜晚食魚一丁既,未試過去食晏...原來晏畫既菜牌好少選擇,都係定食多,不過一個定食連加一都要成差唔多$100,都算幾貴架喎~~

我已經同暑期工妹妹灌輸左任食既概念,佢地果然唔客氣,叫左個$360既刺身船~~隻船就大隻啦,不過刺身其實唔多,有龍蝦、甜蝦、帶子、吞拿魚,仲有一隻唔知係咩~~

另外就叫左幾個定食share食,仲有南瓜蕃薯天婦羅...味道都唔錯,我地個個都食得好飽,不過係貴d啦...好在老闆請...我見埋單8折左要7百幾蚊架~~

認同感

2位暑期工妹妹為我呢2個月既工作帶來不少生氣(是生氣盎然的生氣啊)

本來我們只是聘請1位暑期工的,不過老闆見合心水又多野做,所以申請請多位...本來後來批准的空缺我是支持一位CU的男生,不過老闆都是喜歡女生多一點,結果就依老闆請了2位HKU的女生了~~

她們真是幫了我很多的忙,分擔了我不少繁重的工作,工作態度也是一流的~~最重要的是可以和我傾下計呢~~又有好多零食分享,真係開心好多架~~

今日請佢地食晏時都有問及她們對這份暑期工的感受,估不到她們也感覺到那位ACO的為人如何~~這是有點令我意外的,因為我眼見ACO對她們也不錯,常常請她們飲野,有講有笑呢~~

有人認同我的感覺實在很開心,於是我終於可以滔滔不絕向她們訴說我的遭遇,她們也有告訴我她們的事件,真的估不到那個ACO連暑期工都一樣卸責

下星期辦公室又回復死寂,我想我會十分掛念和她們一起工作的日子~~

上海姑娘

話咁快暑假又就黎完勒,我有份請個2位暑期工番埋呢幾日就開學啦~~佢地工作上都幫左我好多,而且令沉悶既辦公室多番d笑聲,亦可以有人同我傾下計~~

於是今日以個人身份請2位暑期工妹妹食番餐晏,聽日就輪到老闆請呢~~

2位妹妹都未去過Megabox,於是就同佢地去一去,最後選左呢間上海姑娘~~3個人安排坐卡位,坐位好寬敞,好舒服

佢都有午市套餐,不過最後我地決定散叫(因為呢期Megabox有張優惠卡,其中7間食肆既午市有折或優惠),上海姑娘午市散叫有8折呢~

我地叫左5樣野~~

上海小籠包-4隻($26):質素都唔錯,好多湯汁呢,皮薄而不易穿~~

雞絲拌粉皮($48):我就覺得唔係太夠凍,而且麻醬味偏淡,味道一般~~

三鮮炒年糕($65):掛住講野唔記得影相添...不過份量都幾多,味道亦偏淡~

酸辣湯拉麪($35):味道又係偏淡喎,麪條都ok~~

乾煸四季豆($60):呢味既味道最濃,用黎撈年糕食就perfect勒~~平時唔鐘意食四季豆既我都食左好多~

加一照原價計,折後埋單$210,人均消費$70,折左都要呢個價係貴左少少既...食物味道偏淡,不過我諗我都唔會成日黎食野架啦,一次半次無所謂啦~~

青亭素食料理

前排係屋企附近見到有間新食肆 ~ 青亭素食料理...本來見到素食都無咩興趣,因為我唔係太鐘意食蔬菜類既食物...後黎見到報紙介紹係新派既日式素食料理,好似幾得意...上星期想去食仲要等位添...今日終於食到啦~

舖面細細,得2個待應,坐滿都係得22個位,餐牌簡單,價錢亦唔算貴~~

老公叫左盛岡豬扒烏冬定食($34):定食有味噌湯、沙律同埋甜品...烏冬湯底同味噌湯都係超甜,應該係用蔬菜煲既,不過我覺得甜得滯~~豬扒有點點午餐肉既感覺,不過我地都食唔出係用咪黎整既~

我就叫左汁煮鰻魚飯定食($34):我都食唔出係咩黎既,不過就好似硬左少少...個飯好多菜(紅蘿蔔、西蘭花、椰菜),不過出奇地我又覺得佢d菜幾好味喎,所以食晒呢~~

另外老公叫左個和風一口牛肉,一樣都係食唔出係咩食材,不過味道唔錯~~平時好少食素既我,對用日式煮法黎處理素食頗為欣賞,因為比中式煮法少油好多...其中以豬扒味道像真度最高,其他都唔係太似,不過味道都唔錯~~埋單$101,想食清淡d既時候又多個好地方食野勒

 

0825的晚餐 ~ 蒜茸包+碟頭意粉

之前係吉之島買左樽香草蒜茸醬俾老公用黎搽法包食,所以今日買左條長法包,切開搽上香草蒜茸醬放入焗爐~~嘩,好靚喎...味道仲好似係街食添呢~~

本來老公話叫外賣既,不過我又唔想打電話叫...最後是但炒左個菜,煎左腸腸再配意粉,簡簡單單整左碟碟頭意粉...好飽呢

老公的新電腦 + 數碼相架

老公既電腦已經壞左幾個月架啦,一直都係share我部notebook用呢~~

由於老公部電腦係去電腦中心砌機番黎既,估唔到唔夠一年貨仔就壞左....老公檢查完覺得應該只係燒左底板,其他配件依然正常,但係佢又唔知點樣換過塊底板...就係咁一直拖下拖下都未整~~

後來老公知道加左人工就決定去買番部新電腦勒~~老公只係要基本功能就得,所以都無咩config.既要求,最緊要都係睇價錢~~但係佢已經唔想再買砌機...於是就去睇廠機啦~~

老公唯獨對lenovo有偏見,話幾平都唔買,因為佢公司就係換左一批新既lenovo,唔夠一個星期就壞機,所以有強烈陰影呀~~

最後我地係泰林買左Metalware既廠機,8月頭就買左架啦,等到今日先送貨呀~~

呢部機真係好普通既config架咋,不過勝在價錢平,只係$2999,仲有好多禮品送

Metalware Ti-2600DM-S160

-Intel Pentium D 805處理器(2.66GHz, 533FSB, 2M)

-Windows Vista Home Basic Edition

-1GB DDR-2 記憶體

-160GB SATA 硬碟機

-18x DVD+/-RW Supermulti 燒錄機

-內建3D圖像顯示

- 5.1聲道音效

- 10/100M寬頻網絡卡

- PS/2鍵盤及光學滑鼠

- 3年保養及首年上門維修服務

禮物包括:

Intel Webcam

Intel 7" LCD相架

1GB MP3手錶

1GB Intel 手指

我最鐘意既當然就係Intel 7" LCD相架啦,話晒係街買點平都要7百幾蚊架...感覺上就仲抵~~

而且老公裝左電腦之後仲發現跟機已經有埋Office以及Anti-Virius既軟件....好似比係電腦展買仲抵咁呢~~

第尾牛扒-大興餐廳

其實我唔知自己有無讀左呢間大興餐廳既大名 - 第尾牛扒,因為佢既字體實在非常潦草~~

佢係旺角中心對面,係一間老字號既豉油西餐廳,老公話佢讀書個時久唔久都會黎食晏,抵食夾大件呢~~

懷舊西餐廳格局,未叫野食,待應已經黎定餐包擺低,仲問我地係咪飲羅宋湯添,真係有效率~~

我叫左芝士焗蝦球飯($36),原來佢會倒左落隻碟上架~~蝦球大隻,炸過先焗,都唔錯呀~

老公就叫左鐵板黑椒肉眼扒($36),好大塊呢,其實味道都唔差架~~

羅宋湯好味道,好多蔬菜好足料呢,仲有懷舊花奶o者o厘做甜品,不過依然包餐飲,凍檸水凍檸茶,好飽呢~~埋單$80~~

《五星級大鼠》(Ratatouille)

今個暑假真係算去戲院睇左好多電影呢~~

琴晚係旺角百老匯買左今日1040既早場睇《五星級大鼠》,$30張飛我就會捨得lor

我幾鐘意呢套卡通片喎...雖然現實中既我好驚老鼠,不過睇卡通片就唔會怕啦~~而且講煮野食,投入感可以大d,而且我都覺得好好笑...一套唔錯既卡通片~~

不過一向鐘意睇卡通既老公卻評價一般,佢話唔鐘意張柏芝同鄭中基配音喎...不過佢就大讚3G graphic, 話畫得好靚喎~~

如果係我呢,我就鐘意呢套多過Simspons啦~~

峰壽司

因為將個信用卡迎新禮物套現得到$650,所以決定同老公去食餐勁既...終於去左試峰壽司啦
我地個籌係100,之後周圍行下街,最後8點9可以入座食野~~

可能我地太肚餓啦,一坐低老公就拎左碟三文魚壽司...另外拎左碟炸蠔俾我,我絕對唔建議大家係迥轉帶拎炸物,因為已經凍晒,變得唔好食啦

之後我地就轉晒寫單落order~~最難忘係老公叫左個特大三文魚壽司($25)...好長個碟呀~~

另外有幾樣都好好味既,就係

峰玉子($12)~玉子仲熱架,軟滑帶甜,好味道

芝士薯波($20)~都話炸物要order架啦,呢碟真係熱辣辣,味道超正,必食

至於其他都唔錯架...

火灸盛(汁)($25):分別係火灸三文魚,火灸鰻魚同埋火灸帶子

費城卷:內有芝士,老公好鐘意食~

燒肉卷:老公點既,味道唔錯~

牛肋肉壽司:都係老公叫既,同燒肉卷有d相似~

腐皮壽司($9):當然係我叫架啦,我最鐘意食d基本野架啦~~

我地簡直係以狂風掃落葉既方式食晒呢10碟野,為時只係30分鐘咋~~其實我食到一半都已經開始飽架啦~

我覺得峰壽司同板前壽司味道都不相伯仲,感覺上峰壽司稍稍優勝,特別係佢既特大壽司系列~~不過板前就好似多d特別口味...至於一壽司就給比下去了~~

呢餐真係都幾豪架啦,埋單$204,我見張單打左9折呢~~

贈品變現金

上次去北海道除左因利乘便簽滿左老公張新BEA卡而換左個室內無線電話之外~

亦簽滿左我個2張新既BEA卡,而我既迎新禮物就係Panasonic LS 70既數碼相機

因為一度斷貨,所以前排先拎到手咋~~

本來都有諗過自用既,不過原來呢部DC係入電芯既,所以自用既興趣就大減勒~~

於是決定賣左去套現,可惜宜家用yahoo,ebay拍賣都要收費,

所以最後決定去二手舖頭變賣~~

今晚就同老公去旺角套現,問左幾間最後以$650成交~~

雖然比我預期既價錢略低,不過可以折現,總好過擺係屋企唔用啦~~

北海道の初夏物語 ~ 超爽的私人風呂 Day 8.1

琴晚食完豐富既晚餐之後,休息左一陣兩口子就去享受露天私人風呂勒~~

雖然風呂對出唔係海景只係樹景,不過當身處大自然當中,周圍黑漆漆,聽到既係天籟既聲音,自己又全身赤裸咁浸緊熱呼呼既溫泉~~可能想像係幾咁令人舒暢,真係有種遠離煩囂既感覺

其實我以前並不喜愛浸溫泉,那並不是因為要光著身子與其他人一起浸的關係...而是著實領略不到浸溫泉所帶來的那種消除疲勞的效果~~可能人越大,疲累的感覺實在比從前強得多,現在的我是愛上了浸溫泉~~不過我依舊不愛那種強烈硫磺味和混濁的泉水~~這裡的溫泉是清澈而沒有硫磺味的...實在太捧了

我和老公深深體會到溫泉可驅散疲勞的效果~~因為我倆浸完後已經很想大覺瞓啦~~就連剛才大出血的數十袋戰利品沒有pack好也不理,倒頭便睡著了

他他米沒有影響我們的睡眠質素,一點也不覺得不舒服呢~~

但我還是很精靈的5時多就起床pack行李,整理好還可以再浸多次溫泉先去食早餐呢~~