7月生日飯終極一擊 ~ Main St. Deli@Langham Hotel

生日正日既晚餐當然要去食貴野啦,我定左去屬於朗廷酒店既Main St. Deli

我個人十分偏好朗廷酒店(前身鷹君酒店時期已經支持),因為係我擺酒既地方我鐘意佢夠grand,服務好,食物質素高...總之係我眼中就樣樣都perfect啦

連埋今次,我應該已經食勻晒佢所有既餐廳啦~~

L’Eclipse : 以前叫Sun Cafe,我同屋企人都好鐘意去食佢既buffet架~~不過宜家裝修左無耐,仲改埋名,我就未去過啦...相信食物質素應該無變~~

T'ang Court : 唐閣既菜式屢獲殊榮,味道係點唔使多講~~雖然無正正式式咁入去食,不過擺酒個時都係佢個廚房整既,雖然我只係散席之後先上房品嚐,不過依然覺得好好味....仲記得好多朋友之後同我講話食物好正呢~~

The Bostonian Restaurant : 呢間就係結婚一個月紀念日去食既~事源我係酒店出閣,個日我仲訂多左間房俾屋企人住,房價係包左晚餐既~~但係個晚擺酒邊個會食呢?所以我就延遲一個月先去食(服務幾好呀,咁都肯)...仲係一個好豐富既fine dinner添呀,超正~~

Palm Court : 呢度就係食英式High-tea勒~~個時我為左訂房有折扣,所以入左佢個Entree Club會藉~~其中有2張免費High-tea Coupon,所以又試埋...真係好嘆架~~

哈哈,好似講得太多添~~講番Main St. Deli先,佢最出名就係漢堡勒...之前見菇時去試既時候已經好想去食,雖然個時做緊promote添...不過又無咩特別理由去食咁貴既漢堡飽(閒閒地都過百蚊一個架),所以最後都無食到~~

難得今次收到HSBC既生日優惠,去朗廷酒店食飯滿$500可以有85折,再送一枝紅/白酒同埋生日蛋糕..最後我決定去Main St. Deli食漢堡做生日

雖然餐廳細細,不過係一間grand既高級快餐店~~我地被安排係比較入既卡位,都幾舒服架~~

一坐底就送上椰菜絲同埋酸瓜,我覺得個椰菜都整得幾好味~~

呢枝就係送既紅酒啦,老公話都ok喎~~唔飲紅酒既我就叫左杯Homemade Lemonade($48),真係調得幾好味喎,比出面既檸檬梳打唔同d呢~~

一向都知美式食物係幾咁大堆頭,想試多d款式一係就搵多d人一齊去食,一係就叫d迷你拼盤~~所以我就叫左個Deli Sampler - starter($148),分別有

Latkes  - 即係potato pancake with apple sauce,我就覺得個apple sauce太甜,配埋一齊食好似唔係好o岩key,所以我都係用黎配沙律醬,咁就o岩feel好多啦~~佢同平時食開既薯餅唔同,係將d薯仔壓得好實架,初初我仲以為係多士添呢...都幾得意同特別架~~

Knish - 即係crispy breaded potato with minced kosher corned beef,呢個都係薯餅,不過口感完全唔同,呢個似係薯蓉混埋少少牛肉再炸既,但係一d都唔油膩,好味道~~

Small protion of chopped liver with brown bread:呢個唔知係用鵝肝還是係鴨肝,不過加埋洋蔥配麪包食又真係好唔錯喎~~

Fishball:呢個相信係最差既一款,唔知係咪凍食既關係,我覺得有d腥,呢個麻麻地勒~~

呢幾款starter,如果散叫每款都要差唔多一百蚊架,所以都係拼盤抵好多

跟住就係今晚既主角出場啦,下面呢個係老公自己叫既

Ultimate 54 Burger ($148): 呢個係佢地既廚師推介,個漢堡真係好大堆頭架,幾層樓咁高呀~~除左有好juicy既漢堡之外(幾時聽過食漢堡包都會問你要幾成熟架),仲有雞蛋、煙肉、生菜、芝士、磨菇、蕃茄、青瓜....真係點可以一啖咬得晒呀

結果係每層切少少,跟住吉埋一齊食先可以感受到個樣美味~~我都試左少少,好正呀~~老公要左普通幼薯條,味道同平時食開既差唔多,不過就唔油膩,炸得好好呀

而我食呢個呢就係史上最強既超級漢堡

Wagyu Beef & Folie Gras Burger($338):即係和牛鵝肝漢堡,一日只係出品5個架咋,所以我訂位既時候已經留左呢~~雖然唔及宜家洲際推出既$1288和牛吞拿魚漢堡咁勁,不過我相信一定同佢有得揮

我同老公都要左7成熟既漢堡,入口真係好juicy架,而且入面既鵝肝一咬就有醬爆既感覺...呢個勉強都可以一啖咬得晒個漢堡,食落去既時候真係有種幸福既感覺...我分左4分1個俾老公食,老公都食到好感動呢~~賣咁貴真係有道理架

我要既配菜係佢獨有既Sweet Potato Chip,即係蕃薯條...甜甜地好特別,好似細個食既蕃薯薯片咁既味呀...正~~而且佢既炸物真係炸得好出色,一d油膩既感覺都無,究竟係點炸既呢...我推介大家一定要試蕃薯條,出面應該食唔到呢~~

嘩,唔好講笑~~我同老公食得晒所有野簡直係一個奇蹟...老公飽到要除褲頭扣,而我亦食到個肚好似有左咁誇張~~之不過我地仲有個蛋糕喎,訂檯時佢話有3個味道,我就要左芒果,因為感覺清d~~

個蛋糕都幾靚呀,我少少咁切左個角仔...哈,感覺好似食緊芒果布甸咁,只係底部有層好薄既清蛋糕,一d都唔heavy喎...

不過我同老公當然食唔落啦,所以幾乎原封不動咁拎去打包啦...個外賣紙袋好得意呢~~今餐唯一美中不足既地方係冷氣太強勁,搞到個漢堡食到一半就凍左,如果keep住熱辣辣就好啦~

呢餐折左之後要$645.6,不過我覺得值回票價,好過去食buffet啦~~

其實我仲有好多食物想試架,例如佢既 Brooklyn Salad, Mushroom Soup,The Village Voice, Our Very Own Reuben, Four Egg Benedict, Blue Ribbon Beef Burger, NY Cheesecake......唔知幾時再有機會一試呢~~

其實我好想再join Entree Club架,只係千二蚊左右,但係回贈番好多食劵,2個人去食可享有半價...佢仲會開2張主卡,最衰屋企人唔會肯同我share join啦,佢地知道我有借黎用就得,使咩同我夾錢先得架....有無邊個有興趣架,如果係記住搵我呀~~

http://hongkong.langhamhotels.com/dining/hong_kong_restaurants.htm