《不能說的‧秘密》(Secret)

今次《不能說的‧秘密》既贈卷係黎自Openrice.com架

其實我初初係無興趣睇呢套戲架,周杰倫自編自導自演喎,我覺得可觀性應該係一般~~但係我睇到不少人既影評都話好有驚喜,但係大家都無講套戲既秘密係咩...就係咁引起左我既好奇心,搞到我由無興趣變左好想睇...結果叫老公伴我去睇,老公勉為其難答應...好在無係開畫首週去睇咋,因為張贈卷星期五先收到~~

今日娘家約左去cwb翠園飲茶,所以順便係UA時代換左1415個場既戲票,好在仲俾我搵到後排既座位咋~

估唔到呢套戲真係幾好睇喎,我覺得唔係一個咁愛音樂既人應該編唔到一個咁既故事~~而且戲中既秘密果然幾特別,其實套戲開頭都覺得古怪架啦,不過我都係估錯左少少~~

有幾個場景我好鐘意既~

1.鬥琴一幕十分精彩,周杰倫既鋼琴造詣果然厲害,我好想同戲入面既人一樣拍手掌呀~~就連老公都話呢幕好精彩~

2.小雨同小倫四手聯彈一幕,好浪漫~

3.黃秋生同周杰倫跳舞個幕好好笑

而且配樂真係好好聽,睇完我想去買張sound track添...挑起左我荒廢左好耐既彈琴興趣~~

如果係男生既話就應該會鐘意睇2位女角~~桂綸美有點點吳倩蓮既影子,不過個樣開心d無咁苦,佢唔可以話靚,不過有氣質~~暗戀周杰倫個位女角都好靚,老公都話靚呀~

我好鐘意呢套戲呀,鐘意音樂既人(特別係鋼琴)應該不容錯過~~老公都話套戲比佢預期好睇好多...大家快d去睇下啦