北海道の初夏物語 ~ 《幸福駅》祝福典禮 Day 2.4

經過50分鐘的巴士車程,大約11點左右我地終於都到達今日重點活動既目的地《幸福駅》

幸福駅其實係一個已經荒廢左既站,呢條列車線已經停駛左好耐,不過因為其中2個站名好特別,所以保留左落黎成為小小既旅遊景點 - 一個叫《愛國》,一個叫《幸福》...愛國對我黎講感覺不大,相反幸福呢2個字真係好吸引,我相信每個人都希望擁有

幸福駅其實範圍好細,就係得呢間屋仔,右手邊係幾間賣紀念品既店舖,仲有架停駛既列車俾人參觀~~如果唔係我見到有呢個祝福典禮活動,我都唔一定會將佢列入行程之中,因為交通時間對比參觀時間實在唔多化算,大家想去要諗清楚啦,一係好似我咁參加典禮啦

係呢到我要多謝日本方面既工作人員~呢個典禮係我無意中係網上面睇到既,不過睇黎睇去都係得日本當地人參加,但係我又好想玩喎,於是就膽粗粗send左封email過去,不過等左成2個星期都無回音,正當我以為無希望既時候我終於收到《帯広市国際交流課》回覆既email啦...我相信係因為觀光部(典禮既主辨單位)既同事睇唔明我封英文信,幾經轉折就搵左国際交流課黎回覆我~

相中坐係我右手邊既係屬於交流部既日文英文翻譯Ms. Naoko Yamada ,而左手邊就係觀光部既同事,典禮既相都係佢幫我影架~~中間張相既灰衫白長褲個位就係觀光部既課長大久保先生,佢親自係巴士站接我地,仲車我地入去幸福駅添(因為落左巴士之後應該要行多大約15分鐘先見到幸福駅間屋仔架)

而另一張相既鬼佬就係同我係email溝通安排既Greg Hertel勒,如果唔係我係度搞搞震,佢地就唔使星期日都要黎開工,專誠黎招呼我啦~~而帶左帽個位婆婆叫田岡佳子,係佢主持典禮同埋幫我地選禮服婚紗,仲幫我地著上身添~~

典禮都好密架,我地既典禮定左11點半開始,不過之前依然有其他日本人做緊儀式,所以我地就周圍影下相先~~我地去左手信店買左張幸福車票,仲要求印上我地既結婚紀念日既日期...睇睇下野有人問我地係咪香港人,原來幸福駅係星晨旅行團其中一個景點,老公話問我地個位應該係導遊,佢仲問我地係咪自由行黎添...不過佢地逗留左一陣就走啦,佢地都唔知我係等緊行禮呢~~

左上:屋前可以扮鐵道員影相,手信店有真帽同件褸出租著黎影相架~

右上:屋內招募參加典禮既宣傳牌

左下:呢個水泵真係泵到水架,仲叫幸福之水添~

右下:俾100 yen就可以係其中一張願望紙寫上願望,然後係屋內是但搵個位貼,老公要左張金運(因為佢想中六合彩呢)

未行典禮前,我地都影左好多相...雖然呢度好細,不過唔知點解影出黎既相都有種恩愛同甜蜜既感覺

其實典禮好短,只係10分鐘左右,首先田岡婆婆會講一段野(好在有翻譯姐姐,所以我都明白內容),跟住有張幸福卡俾我地寫上愛的宣言(之後佢會貼張典禮相係卡入面送俾我地架)~~跟住就係敲幸福之鐘既儀式...再係草地影幾張相就完成架啦~~

除左有張相,有張卡,佢地仲送左2個公仔匙扣(我係手信店見到要600 yen一個架),2個開運小牌添~

Greg Hertel之前已經問准左我地話有2份報紙想採訪我地(因為我地係首對參加呢個幸福典禮既外國人),下面張相就係訪問既情況,多得翻譯姐姐我地先知佢地問咩咋(估唔到我地係日本會講咁多英文),呢2份就係《十勝每日新聞》同埋《讀賣新聞》勒,佢地會將2分報紙寄番俾我香港既地址呢...除此之外,原來佢地想係機場用我地既相為幸福駅做推廣,為期一年喎,我地都答應左,不過走既時間係機場唔覺眼有,我諗係放左係入境個邊啦,如果大家係北海道機場見到既話,麻煩影低佢send番俾我呀~~

不得不提既係呢間小木屋,入面放左好多婚紗禮服,老公都係第一次著"踢死兔",估唔到唔高既佢都carry得唔錯喎...而我個件就係一字膊,仲有好多小花花,個個都話kawaii喎,不過我著起左顯得肥左好多好多,但係老公話靚我就費時換個件啦~~最搞笑係老公個件禮服恤衫係假架...好似件肚兜咁架,用件外套遮住架咋,好搞笑呢~~

唔記得講,呢個典禮既費用只係3000 yen,HK$200有找,扣左送既2個公仔匙扣都係1800 yen,簡直抵到爛啦~~而且咁好服務,又有報紙訪問咁樣,完全係喜出望外呀~~

http://www.city.obihiro.hokkaido.jp/hp/data/page000003500/hpg000003437.htm

http://www.city.obihiro.hokkaido.jp/hp/data/page000003500/hpg000003459.htm

北海道の初夏物語 ~ 走向幸福的巴士 Day 2.3

係我地食甜蕃薯之前,我地先去視察一下乘巴士既地方~~

帶廣駅前就係巴士總站,我地好順利就搵到要坐既廣尾線路,時刻表同我之前上網睇既一樣係1010會有一班開出~~由於呢到係巴士總站,我地見到巴士總站既辦公室,於是入左去買車票~~

我地今次活動既地方叫《幸福駅》,呢張就係由帶廣去幸福既巴士車票勒,每人590 yen~~可惜張車票係要落車既時候俾左司機既,所以我地買左就即刻影低佢

大家可能會問如果係中途站上車咁點買票呀其實一上巴士大家就要取乘車劵,劵上既資料係被司機知道你係第幾個站上車,如果你無取乘車劵,司機就會當你係第一個站上車(即係總站)黎收錢架啦~~司機位既車頂位置有個顯示牌,會顯示每個站上車既車資,咁你自己知道你要俾幾多錢啦~~不過我地係總站上車,所以可以去買定車票,其實唔買都得架,落車時俾590 yen就可以架啦(不過就無得找續勒)~~

車程途中見到有人玩熱氣球升空,其實我一早就知道十勝(帶廣所在既地區)同富良野都有得玩熱氣球,不過其實我對呢個玩意無太大興趣,所以無計劃去玩...咁o岩見到就影張相留念啦,個熱氣球都幾靚呢~~

http://www.tokachibus.jp/rosen.php?xlink=pockettime 

(我係坐60號既廣尾線,有pdf版既時刻表,不過要細心d睇呀,好易搞錯架)

北海道の初夏物語 ~ 帶廣名物特色甜蕃薯 Day 2.2

到左帶廣之後我地要再轉巴士先可以去到今日活動既目的地,由於巴士要1010先開出,所以我地就係車站行下,順便買野食做早餐~~

雖然好少旅遊書介紹帶廣呢個地方,不過我記得佢有幾樣特色食物係帶廣先有得食既...其中一樣就係今日早餐既主角 - 甜蕃薯 -

因為我地好早就到,所以車站內既手信店仲有得賣,價錢因應蕃薯大小而定,我當然選左個最平既再買左樽焦糖牛奶布丁,合共972 yen~~

雖然係最平個舊甜蕃薯,不過一樣好大個,仲用個靚靚盒放呢~~我地搵左個樹蔭下既地方食,老公搶住試食第一啖甜蕃薯...嘩,佢個樣一睇就知好味到震,仲不停咀係咁食落去添~~終於輪到我試啦,完全無想像過蕃薯可以整成咁既味...好香好滑,甜甜地,食到中心仲有d 牛奶cream...完全係唔知佢點整既,好特別好出色既甜蕃薯,係我既誠意推介,大家見到一定要試呀

個甜蕃薯被我地係咁搶食,瞬間就消滅左啦~~而個牛奶布丁都好滑,不過食到樽底既焦糖就有少少苦,相對個甜蕃薯真係失色左d,不過之後我還是不停的試其他地方出品的牛奶布丁,今日呢個應該係d不知名既牌子,所以差左少少啦,但係我都好鐘意食~~

 

北海道の初夏物語 ~ 向帶廣出發 Day 2.1

6月17日(星期日)

第一晚係北海道我同老公都瞓得好好,老公話佢好怕瞓生保床,不過一來之前係機場露宿左一晚好累,二來佢話東橫Inn張被軟綿綿好舒服喎...難得老公瞓得好,今日可以精神奕奕出席今次旅程其中一個重點項目勒

如果大家仲記得我篇前言(住宿篇)應該會知道我個時仲未決定第二日既行程,其實我係同日本個邊溝通緊參加一個儀式,不過因為唔知成唔成事,所以我就無講出黎...如果唔成功,我可能會去函館架,不過最後安排到就唔去函館勒~~函館就留待下次去北海道先去啦

今日既活動要坐JR列車去帶廣駅,我地要搭0703個班特急列車(架列車既終點目的地係釧路),所以就連東橫Inn免費提供既飯團早餐都趕唔切食(因為7點先開始)~~

去到JR駅就見到好多學生排晒隊入閘,我諗佢地係去旅行啦~~呢班列車我一早已經係機場既JR旅遊中心訂左指定席既車票(用JR pass訂指定席係唔使加錢既),我地係坐5號車卡呀~~呢架特急列車被普通列車靚仔d,流線形好多架

經過2個多小時既車程,我地終於係0919到左帶廣駅啦

北海道の初夏物語 ~ 《禪》黑毛和牛shabushabu放題 Day 1.6

大約10分鐘就可以由大學返回酒店,經過前一晚係機場留宿,其實我同老公都好想休息,所以就係晚餐前既呢段時間休息下,洗個面先再出發~~我地番到酒店就拎出相機既叉電器,係呢個時候老公先發現佢唔記得帶旅行用既變腳器,咁樣好大鑊喎,相機無電唔通係北海道買過一部咩,我地都唔知點算...不過都要醫肚架,於是我地就出發去食晚餐~

因為老公唔食海鮮,咁我就搵左間食牛肉放題既《禪》去試下,地址係中央區南2條西1丁目,我地搭地鐵係大通站出,見到有間好大既100 yen店就入左去睇,老公希望搵到3腳變2腳既插頭,不過都係搵唔到~~

不過原來間《禪》係100 yen店既附近,佢係地庫既(正確d講係狸小路1丁目附近),我地入去既時間大約8點左右,我無訂定位,不過都可以坐房喎,真係好勒

2人一房坐得好舒服,我係網上印左張9折割印劵,哈哈,估唔到身在北海道既我都依然有好多coupon要用~~

我地叫左個黑毛和牛放題,雖然唔係最頂級,不過都唔cheap架~~折左之後每位4700 yen,我地無加錢要任飲,不過老公叫左杯梅酒梳打(450 yen),老公勁鐘意飲,我試左一啖,唔鐘意飲酒既我都覺得唔錯

(呢間就係我地食野既房勒)

待應姐姐幾靚女架,服務又好,雖然我地唔係好明佢地既日文,不過佢地都好努力嘗試用英文解釋,指手劃腳之下,我地都順利點菜~~放題可以選shabu shabu或者另一款煮好晒既(我唔記得叫咩名),最後我地叫左shabu shabu~~

首先有一碟雜菜同一碟黑毛和牛,碟和牛切得好薄又砌得好靚,齋睇顏色都知新鮮好味啦我地初時以為雜菜只係得一碟,點知原來都有得添架~~而d和牛食落真係唔同d,雪花分佈均勻,唔似香港既肥牛咁多肥膏~食落有入口溶化既感覺,而且牛味明顯不同,不過我又唔識形容~~而且佢既麻醬汁亦十分好味,更加提升整體既好味指數

總之就好好味啦,我地食得好快,無記錯應該食左有成8大碟...到我地同待應姐姐講夠既時候,佢再問我地要拉麪淨烏冬...我即刻叫左一聲,原來仲有碟麪呢~~最後我地要左烏冬,好在又唔算好大碟,所以一樣食得晒~~

老公對我今晚既選擇好滿意,呢餐就承惠8910 yen~~為起唔使HK$600,我地都覺得超值呢~~

哎呀,唔記得左講,我地埋左單之後,經理話個筷子托我地可以拎走架,佢話係紀念禮物呢~~我記得有個禪字既,我放左係邊呢,番左黎都唔覺眼佢有出現喎...等我搵番出黎至得

http://www.mooshabu.com/zen/plan/index.html

0629的晚餐 ~ 豆醬枝竹小棠菜

今日下畫去左太空館聽briefing,所以可以慳番放工搭車既時間~~所以放工之後就去左買餸~~

見有時間,今日決定煲番個湯 - 木瓜瘦肉雞腳湯,不過到食飯時都仲係淨咁d味~~

芝士椰汁焗雞:好耐都無整啦,不過今日得齋雞無放配料,不過依然美味~~

豆醬枝竹小棠菜:今次係第一次整枝竹,由於係炸枝竹,所以要多d時間炆...用上老公鐘意既豆醬煮,佢果然好鐘意食呢~~

雖然只係兩餸一湯,不過我地都食唔晒

北海道の初夏物語 ~ 北海道大學 Day 1.5

雖然已經畢業多年,不過我真係好鐘意大學既生活~~去旅行我都幾鐘意八下當地既大學,難得北海道大學有2條出名既銀杏林蔭道同埋白楊林蔭道,所以我就同老公坐地鐵由圓山公園去《北12條站》行下北海道大學勒

大學都有好多入口,我選擇既呢個入口一入就係銀杏林蔭道,成間大學好大自然feel...走在路上一直都有樹蔭,感覺十分清涼~~本來想扮學生去飯堂試下(因為學生價錢但係品質出眾),可惜既係今日星期六飯堂只係開到2點咋~~我地去完祭典先過黎都已經4點幾,收左工啦~~

途中見到紅磚外牆既博物館,我竟然覺得有少少Harry Potter間魔法學校既感覺~~不過我地都係志在感受下大學氣息,所以都無入到去博物館參觀...走時見到經濟學部,畢業於經濟系既我當然二話不說影低佢啦~~

悠悠閒閒咁行下,5點幾就參觀完啦~~出口行番酒店都唔係好遠,我地決定番酒店休息一陣先出去食晚飯~~

如果大家無大學情意結,其實都唔使特登去行架