呢期先發現原來7月真係好多人生日架
Joey媽好好咁約左我地TjNs三小花(T=譚太,j=Joey,N=吳太,s=Sher, 菇時你幾時可以轉大楷呀
)721一齊聚下,順便當係7月生日會~~7月壽星就係滿2歲既Joey
同埋已經廿到尾既吳太
~~唉,相距最少廿幾年既兩位壽星女,當然以青春無敵、活潑可愛既Joey妹妹成為全場既焦點啦
好在兩位小花好錫吳太,送左Crabtree & Evelyn既香水俾我做生日禮物,真係多謝晒
~~雖然我好少塗香水,不過我會學習用多d,增加女人味以達吸引力既新層次
上次Joey妹妹黎我屋企玩時,老公成日都入左房唔出黎,所以同Joey妹妹好陌生~~今日佢既出現,令到Joey妹妹好緊張
...雖然未至於見到我老公會喊,不過就會好擔憂咁望實佢,同埋唔敢行近我老公
..搞到今日既Joey無平時咁活潑...我地叫Joey每人派枝百力枝,唯獨唔敢派俾我老公,好在最後係我地出門口去食飯之前,Joey妹妹終於出手遞左枝百力枝俾我老公....係個一刻大家都拍手掌讚佢乖呢
,但係佢對住我老公依然會收起笑容,好謹慎咁凝視佢~~
係餐廳,Joey妹妹俾左幾個難以解開既「謎」團我地~~
Joey想食拼盤既薯仔,Joey媽覺得熱氣唔想囡囡食於是做晒表情話好辣...鐵男哥哥亦表現佢出色既演技做出一個誇張既辣辣表情~~點知Joey就大喊起上黎啦....究竟Joey係咪俾辣辣既表情嚇親還是無得食薯角而大喊呢
食飯中途老公去左洗手間,大家都無為意之下,Joey媽聽到Joey問「畢畢哥哥(即係我老公)去左邊?」...當Joey媽答話哥哥走左既時候,Joey妹妹竟然想喊喎....我地即時轉口風話哥哥無走只係去左洗手間~~小B心事真係難以明白,點解會咁既呢
食完飯我地要搭巴士去火車站,由於Joey妹妹聽到我地走既反應唔多開心,所以我地就咁上巴士,都無特別同Joey拜拜,以免佢會喊~~~係我地搭火車途中,菇時收到Joey媽既電話,見到菇時不停係咁笑,我好想知道係咩事,原來又係一個「謎」~~
我地走左之後,Joey妹妹又同媽媽講「畢畢哥哥番屋企呀」,Joey媽話佢講左幾次,但係無提及其他人喎~~究竟Joey係掛住我老公淨係想確定佢係咪真係走左呢????Joey媽仲話錄低左段片send俾我地睇添(Joey媽,我上網都load唔到段片黎睇呀,咁點算呀)
我問老公對Joey妹妹既反應有何感想,佢竟然答我"意料中事",真係俾佢激死~~不過佢話Joey都係一個古惑BB,成日做d古惑表情喎
吳太, 見到你個四眼妹造型啦....!!! 成個小雲咁呀~~~
回覆刪除七七:唔係呀麻...似小雲咁搞笑~~小雲個眼鏡係圓形架喎~~
回覆刪除嘩，好詳盡既報導 咁多個謎，洗唔洗搵貽興王出黎解答？不如等我呢個「載屎盆」試下先啦！ Joey每逢見陌生人，特別係男人，佢都會比較怕羞。不過通常過左一段warm up時間之後，佢就會放下戒心。佢個日對住畢畢長時間都神色凝重，依我呢個阿媽既分析，除左以上原因之外，係因為： 1) 畢畢主要係以古靈精怪既表情同Joey玩，無做過一啲比較有交流既舉動（例如：主動嗌聲Joey、俾支餅餅Joey食等等） 2) 我叫Joey嗌你Yvonne姐姐時，畢畢搶先叫肥姐姐。Joey思緒好混亂，唔知點算好。 由於Joey係屬於先觀察而後行動既小朋友，所以第一印象對佢黎講好重要。佢見畢畢古靈精怪，所以細膽如鼠既小Joey，就好似樹熊咁攬住我囉。真係失禮晒 但到左後期，其實Joey已經唔驚畢畢，仲好關心畢畢既去向，只係無膽同佢玩。尋日我抱佢睇你個blog，見到幅大合照時，佢第一時間以好開心既語氣指住畢畢嗌「畢畢哥哥」，真搞笑。 至於突然大喊，平時我都好少見Joey咁失控。都係我呢個阿媽唔好，講大話呃佢，我事後都已經好好檢討過。雖然呢個大話無傷大雅，但都係唔好。 個段movie我諗諗計，睇下點樣可以俾你睇。 最後要多謝吳太教我檸檬批，我好有滿足感呀 個批既質感同味道同上次差唔多，好味！不過我想問，個批要喺幾多日之內食晒佢？
回覆刪除Joey媽: 嘩,多謝你咁詳細解開「謎」團呀~~我已經叫左我老公睇你既回應,仲同佢講Joey見到張合照就嗌「畢畢哥哥」~~雖然佢把口就話佢幾時都咁受歡迎,不過我見到佢個樣係好開心既 個批切左出黎食最好放入食物盒再擺入雪櫃,放3,4日都應該無問題架~~不過如果你覺得雪到有d乾就唔好再擺要食晒佢架啦~~
回覆刪除畢畢事件實在太有趣喇，遲d要再安排Joey與畢畢見面，看看Joey的反應與進展先得。 上次到訪吳宅，辛苦你整咁多道菜俾我們享用，這份生日禮物都只係小小心意啫！因為一直冇聽/ 睇過你話買香水，就買一支俾你試試，這隻crabtree花香都幾清新，得閒塗少少，心情與魅力也會有所提升呢！
回覆刪除Sher: 好,下次輪到你地既生日月份再約,睇下Joey敢唔敢同畢畢玩~~ 一向我都唔多生日禮物收架,所以你地既香水係我眼中好珍貴架,真係多謝晒
回覆刪除嘻嘻...我都7月生日架!!!
回覆刪除新任陳太:又多一個7月壽星女,生日快樂呀
回覆刪除