北海道の初夏物語 ~ 山溪激流 Day 3.4

呢兩幅相係咪好勁呢~~相中既橡皮艇就坐左我同老公係度架

1320負責搞激流既公司TOM就有車黎接我地去佢地既大本營勒...本來就得我地兩口子既,上車前15分鐘牧場另一班住客一行5個香港人臨時決定參加,所以就多左佢地一齊上車啦(老公本來好開心既,點知多左一班香港人一齊佢即時有d失望,可能佢唔想係北海道見咁多香港人啦)

大概十幾分鐘,經過彎彎曲曲既山路就到左TOM既大本營勒,同我地合照既就係我地既教練勒~~

首先就係著上呢件激流戰衣,淨係著呢件衫大家已經好開心,因為真係好難著,件衫會入水既位置物料特別唔同亦特別"絕"肉,好似頸、手婉同腳踝咁樣...著好仲要將衫入面d空氣迫番出黎,好鬼pro呢,咁樣著一著竟然搞左成半粒鐘~~

著好晒我地就出發去玩啦,yeah~~我地今次玩激流既地方叫"十勝川",佢地車我地去上游既落水點,落水之前當然要training啦~~教練講解d手勢同指令,為左方便仲要各位貼上大名係頭盔上面,老公佢好搞野咁寫左Keroro既日文,教練都忍唔住笑

聽夠啦,我地要落水啦....其實條河既水流唔係真係咁急既,而且教練又會避開d危險位,所以其實都好安全架~~咁當然都有驚險位俾我地係度大叫啦,仲成個浪咁衝埋黎成身濕晒架~~

我地可以玩2次架,第一次當係練習...去到下遊終點位已經見到架車等緊我地,車番我地去上游再黎過~~置身十勝川之中,真係覺得大自然好靚架...呢d就係真正既秀麗山河

玩到最後教練叫我地爬上舊大石頭,佢地話呢舊石叫"jump rock",問我地夠唔夠膽玩跳河~~你見我地個個企係舊石到做V字手勢就知個個都玩啦(其實仲有另一隻橡皮艇架,不過個隻艇就係2位婆婆同1位伯伯,所以佢地無玩反而係一邊同我地打氣,之後仲問我地係咪學生呢)

未跳之前都真係有d驚架,我同老公仲飲左啖河水添喎~其實跳左落河之後一直沉,雖然有救生衣都唔係即刻浮上面架,升上水面之後只係聽到有人叫"游黎呢邊呀",跟住佢地就會拖我番上隻艇勒,都幾刺激,幾好玩架~

跳完河就上岸勒,教練話呢度既泥有d閃下閃下既粒粒其實係水晶喎,佢話係好好既手信,仲俾幾分鐘我地係度執...睇下大家幾專心咁搵,不過最厲害係個2位日本婆婆,唔知點解佢執起既都係又大又閃架,勁~~

番到大本營我地又要搞一輪除番件戰衣,呢件戰衣真係無得頂呀,剛才玩到咁濕,但係係底既衫褲一滴水都無,衫都唔使換,超勁...我地仲將大家既名貼係牆身呢~~

咁好玩既激流只係每人5250 yen,大約HK$340....而且仲包埋之後浸溫泉入場劵,講真都幾抵架...係外國玩呢d閒閒地都收你500蚊位啦~~

而呢d相當然係佢地搵人影再賣俾我地啦,所有相燒晒入一隻CD就要2520 yen...係呢一刻個幾位香港人就發揮好大作用啦,因為我地夾錢買1張既話,每人都係360 yen...抵好多呢~~我地交換左email,呢d相就係佢地send番俾我地架啦~~