北海道の初夏物語 ~ 羊の料理 Day 3.6

浸完溫泉番到牧場都6點啦...仲有半個鐘就係食晚飯既時間lu~~呢度養羊既,所以佢既羊肉料理都好出名架,不過因為見到可愛既小羊先令人唔忍心食左佢...不過美食當前都係唔好諗咁多,一於好好品嚐

首先就係充滿花香味既忌廉湯,雖然只係得幾朵花仔,不過即刻覺得個湯好特別...哈哈,都唔知幾咪心理作用,不過我好鐘意飲喎~~

跟住就係沙律,沙律菜真係好新鮮,同我平時食既沙律菜真係爭好遠,我食到甜味呀...一向覺得菜係苦既我竟然食到甜味,真係超級新鮮,相信係附近菜田種既...沙律面既類似海蜇物體好好味呢..不過真係食唔出係咩黎既~~我好快就食晒食兜沙律啦

老公叫左最貴既羊扒料理,好香既迷迭香呢....老公話好好味,我試左一小塊,但係又無老公講到咁正喎,可能平時都成日食呢種煮法既羊扒啦~~雖然伴碟既只係一條蘿蔔,一條西蘭花同埋半塊薯仔,但係味道一樣令人拍案叫絕...老公對鮮甜無比既蘿蔔驚為天人,佢好唔捨得咁分左少少比我試~~果然真係好鮮甜喎,唔通新鮮種出黎即煮既味道真係相差咁遠~~睇黎新鮮既食材真係好重要既味道元素

而我就叫左個平少少既主菜 - 日式羊仔肉(跟飯)

嘩,呢個我覺得好好味呀我覺得比老公叫既仲好食,不過佢當然支持佢自己既選擇多d啦...呢個日式羊仔肉係生生地架,但係食落一d蘇味都無,仲好嫩滑,加上個好好味既醬汁食得我好滿足~~我係第一次食咁樣煮法既羊肉,生生地真係好特別,估唔到咁好食~~

晚餐就係包呢d啦...但係對老公黎講就唔夠飽啦,佢睇到餐牌有pizza就話叫黎食...咁又食多個pizza啦...呢個pizza特別之處在於佢既餅底係用soba,即係喬麥整架(牧場主人話牧場隔離就係喬麥田),所以見到批邊係黑黑地色呢~~

pizza用料雖然簡單,但係新鮮既香草(牧場自己有個香草園架)同蕃茄即時令味道變得與別不同,味道超級清新,而且即叫即製,真係食到唔停得口~~

今餐既羊の料理價值6500 yen,大約HK$420~~呢個價錢係香港應該食唔到呢個質素既食材勒~~