北海道の初夏物語 ~ 有驚無險之Bestom Day 4.9

食完美味既晚餐之後,今日既行程就完成勒~~我地坐JR番去中富良野,雖然已經7點半,不過天色未黑晒,正當想行番去民宿既時候,老公話咁早有無地方可以去~~

於是我話旅遊書推介係中富良野有一間超級廣場Bestom,揸車由JR站過去只係5分鐘,不過就無教點樣行去喎~~老公話坐車5分鐘應該行去都唔會好耐,咁我地就展開左呢個旅程最驚險既旅程

一路行天色開始黑啦,北海道唔似香港咁有街燈,周圍黑麻麻,四野無人只係得田野間青蛙既叫聲...講真都幾驚架,但係洗濕左個頭都無辦法,想行番去民宿亦無可能(因為要上斜架),但係又見唔到的士喎~~遙遠望去見到有個好大既閃閃招牌,我地唯有向住呢個目標行去博一博,就算唔係Bestom都可以搵到的士搭呀~~

終於我地行左1小時真係搵到Bestom啦(唔怪之得叫人有車先好去啦)...入到去係一個超級大既supermarket,咩都有得賣,就連衫褲鞋襪都有~~不過去到老公已經無心情行啦,但係咁辛苦去到老公話點都要買d野走喎~~最後我地只係買左2個杯麪咋(278 yen)

諗住呢到會搵到的士啦,點知成個停車場都搵唔到一架的士,個個都係有車自己黎啦~~最後唯有打俾民宿老闆娘call的士啦...就係咁用左1090 yen坐的士番去,總算有驚無險啦~~